Richard Gascoyne

Ut scimus omnes, maxima flumina de rivulis minimis oriuntur, perinde ac ille quem hodie honoramus, in pago quodam rustico civitatis imperialis discipulos primos erudivit, nunc, plus quam quinque et quadraginta annis actis in nostro regno discendi, affecit succuritque multis milibus non solum discipulorum sed etiam magistrorum omnibus fere in angulis nostrae ingentis patriae ubicumque lux Latinae tenebras inscientiae lucet. Decem annos apud universitatem in urbe capitali huius civitatis imperialis laborabat, mox se familiamque crescentem removit in loca amoena in ultimis finibus "Longginsulae" ubi in oppido celebranti Caput Fluminis velut Augustus Caesar ipse, pater patriae Romanus, magistris discipulisque linguarum externarum praeerat ac cohortem iuvenum rebus Romanis initiabat. Inde regressus ad domum priorem, urbem albam longamque, ubi magister navis Latinae in sua nobili civitate ob regentes insigni fiebat, quo in officio et tuebatur disciplinam nostram et in tempus nostrum gubernabat. Etiam libellos normarum clarissimos inquisitionesque iustissimas concepit et scripsit, quae saluti et usui fuerunt nobis fere omnibus. Creberrimi sunt praeceptores et discipuli quos adiuvit ille libenter comiterque, non solum apud nos, verum etiam apud alias gentes quarum linguis moribusque studet usque in otio. Etiamnunc docet et, more suo, vita fruitur plena gaudiorum mentis cordisque, et in numero amicorum habet nos omnes qui Latinam colimus. Plaudamus igitur Richard Gascoyne.