Jill Crooker

Pharos Alexandriae, res mirabilis inter septem mirabilissimas antiqui mundi numerata, Pharos fulgentissima quae lucem spemque spargebat ac nautas longe errantes in portum tutos attrahebat non plus lucis praebebat quam femina optima quam hodie celebramus. Immo haec strenua doctaque lumen protulit non solum in suam propriam partem patriae sed etiam, propter scripta et contiones et industriam, usque in finis nostrae terrae.

In civitate praesidis illustris, magni emancipatoris, adepta gradum baccalaureae, tum in causa eruditionis colligendae migravit ad civitatem ubi etiam moratur, civitatem duorum praesidum, quoque illustrium, alterius equitis asperi, alterius garrientis prope focum. Diu habitans in municipio suburbano, proximo domo laborum praeclarorum pro suffragio feminarum, primo discipulis deinde praeceptoribus magnopere proderat, ut modis variis rationem Latinae docendae fingebat.

Nuper auctoritas crescebat extra regionem nostram, permultis in viis, nam dux fiebat variorum coeptorum, sed hoc in unum consilium, ut Latinam efficaciter praecipiamus discipulis qui vitam alacerrimam agant. Quam sermones, tam scriptas edidit ut inquisitiones iustissimae utilissimaeque fiant. Plerumque dum cessamus, aestate laborat in conventiculis magistrorum magistrarumque, idcirco fama fit maior. Tabula rerum gestarum longissima est, palmae sunt complures, et decori cordique est nobis omnibus qui hodie plaudamus Jill Crooker.